Талх болон овьёосны жигнэмэгний жор

Ойрын үед талхаа өөрөө барьдаг боллоо.

Барих тусам гарт орж эхэлж байна.

Эхлээд зураг дээрх жороор талх барьсан.

Энэ "Эрүүл амьдралын хөтөч" facebook хуудас бол миний хөтөлдөг хуудас юм шүү. Та бүхэн лайк дарж, нэгдэн эрүүл мэндтэй холбоотой мэдээ, мэдээлэл авч байгаарай.

Хөх тарианы бэлэн зуурмагаар хийсэн талх

Бүхэл үрийн гурилтай талх

Энэ талхны жорыг өөрөө зохиогоод хийчихсэн.

Орц, 2 аяга нэгдүгээр гурил, 2 аяга бүхэл үрийн гурил, гүнжидийн үр 3 хоолны халбага, сүү 1аяга+тал аяга орчим, 1 ш бүтэн өндөг+1 өндөгний цагаан, 2 цайны халбага жамц давс, 2 хоолны халбага зөгийн бал, 2 цайны халбага исгэгч. Зууханд хийхээсээ өмнө 1 өндөгний шар, бага зэргийн сүүтэй хольж дээр нь түрхсэн. Ерөнхийдөө хийх арга нь дээд талын зураг дээрхтэй адилхан.

Би ер нь талхыг их тэжээллэг байлгахын тулд олон орц нэмэх дуртай. Өндөг, сүү, үр тариа, зөгийн бал гэх мэтээр.

Овьёостой печень

Энэ зурган дээрх печень бол овьёостой печень. Ер нь бол эслэг ихтэй, В аминдэм ихтэй болно гэсэн үг. Гэртээ хийсэн учраас ямар ч Е нэмэлт байхгүй. Хэдий элсэн чихэр, тос ихтэй ч хааяа идэхэд амттай, аюулгүй.

Орц: 1 аяга цөцгийн тос, 1 аяга элсэн чихэр, 1 аяга бор элсэн чихэр, 2 өндөг, 2 аяга гурил, 1цайны халбага сода, 1 цайны халбага давс, 3 аяга түргэн болдог овьёос. Бас үзэм нэмж болно.

Цөцгийн тос, элсэн чихрээ холигчинд хийж холиод, өндгөө нэг нэгээр нь нэмнэ. Гурил, сода, давсаа өөр саванд хийж хутгаад өмнөх зуурмаг дээрээ нэмнэ. Дараа нь овьёосоо хутгаад хөргөгчинд 1 цаг байлгана. Зуухаа 190С-д халааж, листээ тослоно эсвэл бор цаас дэвсэнэ. Хөргөгчинд хийсэн зуурмагаа гаргаж ирээд хушганы хэмжээтэйгээр хувааж, бага зэрэг дарж, хавтгайлж листэн дээрээ тавина. Зуухандаа хийгээд 8-10 минут болгоод, харж байгаад хэтэрхий түлэгдэхээс нь өмнө авч, 5 минут хөргөсний дараа листнээсээ авна.

Гишүүнээр чанамал хийх нь

Гишүүнэ бол хүмүүсийн мэддэгээр айраг гэж нэрлэдэг ургамал юм. Гишүүний үндсийг эмийн зориулалтаар хэрэглэдэг бөгөөд 6-10 настай үндсийг нь намар түүж, хатааж, нунтаглаад хоол боловсруулах замын өвчнүүдэд хэрэглэдэг. Ходоод өвдөх, цээж хорсох, өтгөн хатах суулгах, элэг, цөсний асуудлууд, хоолны дуршил сайжруулах гэх мэт хоол боловсруулах эрхтнүүдийн үйл ажиллагааг сайжруулахад хэрэглэдэг байна. 

Харин гишүүний ишээр нь чанамал хийдэг. Гишүүнэ нь кальци, К аминдэм, антиоксидантуудын өндөр агууламжтай. Навч нь хортой тул хэрэглэхгүй зөвхөн ишийг нь хэрэглэнэ.

Би энэ долоо хоногт чанамал хийх төлөвлөгөөтэй байна. Гишүүнэ нь хаа сайгүй их ургадаг хэдий ч аль болох хүний хөлөөс хол, машин замаас хол газраас түүгээрэй. 

Ерөнхийдөө чанамалд маш их чихэр ордог. Гэхдээ би хийхдээ жорон дээрхээс бага хэмжээтэй сахар хийчихдэг. 2 төрлийн жорыг энэ удаад оруулъя.

Жор 1

-Гишүүнэ   450г

-3 хоолны халбага зөгийн бал

-2 хоолны халбага чиа үр (байхгүй бол заавал хийх шаардлагагүй, омега 3, эслэгийн өндөр агууламжтай үр байдаг юм, Органик дэлгүүрт /70159898/ зарагдаж байгаа. )

-1 хоолны халбага шинэ шахсан нимбэгний шүүс эсвэл жүржийн шүүс (савласан шар өнгөтэй шүүс жинхэнэ нимбэгний шүүс биш тул битгий хэрэглэж байгаарай)

Жор 2

-1,5кг Гишүүнэ

-500г элсэн чихэр

-2 хоолны халбага нимбэг эсвэл жүржийн шүүс

Заавар

Эхний жор нь байгалийн сахар болох зөгийн балтай учир боловсруулсан сахар ихээр хэрэглэхээс татгалздаг хүмүүст их тохиромжтой санагдлаа. Элсэн чихрийн ургамлын ихэнх хувь нь генийн өөрчлөлттэй болсон гэж уншиж байсан тул боломжтой бол Органик бор, цагаан элсэн чихэр хэрэглээрэй. 

Гишүүнийг угааж, навчин хэсгийг нь тасалж хаяад, зөвхөн улаан туяатай ишийг нь 1 см гаран хэмжээтэй хэрчинэ. Савандаа элсэн чихэр, эсвэл зөгийн балтайгаа хольж, буцалгаад галыг нь багасгаж ойролцоогоор 25-30 минут чанамал шиг бүтэцтэй болтол нь буцалгана. Гаргахаасаа 5-10 минутын өмнө нимбэг, жүржийн шүүсээ хийнэ. Ариутгасан шилэндээ хийж таглаад жимсний чанамалын оронд хэрэглэнэ. 

Дархлаа сайжруулах энгийн аргууд

Дархлаа тогтолцоо бидний эрүүл мэндийг хамгаалах гэж өдөр бүр зогсолтгүй ажилласаар байдаг. Дараах 6 арга нь богино хугацаанд дархлаагаа сайжруулахад туслах болно.

Байгалийн сайхныг бишрэн алхах

Урт, хүнд, стресстэй өдрийн дараа алхалт хийх нь стресс, бухимдлаа тайлж, тайвшрах хялбар арга болдог. Харин ой мод, уул усанд алхах нь энэ үйлчилгээг улам сайжруулдаг.

Байгальд алхалт хийх үед цусны цагаан эсийн түвшин нэмэгдэж, зүрхний цохилт багасч, даралт, стрессийн даавар болох кортизол буурдаг.

Мөн ногоон орчинд ойр алхалт хийх үед хавдартай тэмцэх чадвар дээшилдэг. Ургамлууд шавьжнаас өөрсдийгөө хамгаалахын тулд фитонцид гэдэг химийн бодисыг ялгаруулах бөгөөд хүн үүнийг амьсгалах үед хавдартай тэмцэхэд тусалдаг натурал киллер эсийн тоо нэмэгддэг байна.

Бид байгальд ойр байх тусам бидний эрүүл мэнд дээшилдэг. Өдрийн турш ихэсч байсан стрессийн даавар нь байгальд хэдэн минут л алхахад л буурах боломжтой байдаг. 

Цэвэршүүлсэн элсэн чихрийн хэрэглээг бууруулах

Элсэн чихэр, чихэртэй хүнс хэрэглэснээс 30 минутын дараа дархлааны үйл ажиллагаа 50% хүртэл хэмжээгээр буурдаг.
Мөн элсэн чихэр хэт их идэх нь зүрх судас, цөсний өвчнүүд, шарх, бүдүүн гэдэсний шархлаа, хэт их идэх, таргалалт, сэтгэл хөдлөлийн өөрчлөлт, донтолт, жишээ нь архинд донтох, гэх мэт өвчин, эмгэгтэй холбоотой байдаг.
Зөвхөн цагаан элсэн чихрээр чихрийг ойлгож болохгүй. Ихэнх боловсруулсан, цэвэршүүлсэн хүнс, чихэр, жигнэмэг, амттангууд чихрийн агууламж өндөртэй байдаг.

Эерэг сэтгэл хөдлөл

Сэтгэл гутарсан хүмүүсийн дархлаа маш сул байдаг байхад баяр баясгалантай, аз жаргалтай, өөдрөг хүмүүс хүчтэй дархлаатай, мөн бие, сэтгэцийн үйл ажиллагаа сайн байдгийг судалгаагаар нэгэнт баталсан байдаг. Ерөнхийдөө эерэг сэтгэл хөдлөлтэй байх нь дархлааны үйл ажиллагаанд сайнаар нөлөөлж байдаг.
Олон тооны судалгаанууд сөрөг сэтгэл хөдлөл дархлаа тогтолцоог дарангуйлах үйлчилгээтэй байдгийг гаргаж ирсэн байдаг. Гуниг, айдас, сэтгэл гутрал, цочрол зэрэг нь дархлаа сулруулж, өвчинд өртөмтгий болгодог.

Инээд

Өмнөх хэсэгт дурьдсанчлан инээх нь дархлааны үйл ажиллагааг сайжруулж, үрэвсэл бууруулахад тусалдаг байна. 

Дэмжлэг үзүүлдэг хүмүүстэй цагийг өнгөрөөх

Тусалж, дэмжиж байдаг хүмүүстэй хамт байх, нийгмийн харилцаанд орж байх нь дархлааны үйл ажиллагааг сайжруулдаг. Эсрэгээр ганцаардал, тусгаарлалт нь дархлааг дарангуйлдаг. Тийм учраас аль болох гэр бүл, найз нөхөд, хамт олонтойгоо цагийг өнгөрөөж байх хэрэгтэй.

Бясалгал

Эцэст нь бясалгал хийхийг зөвлөж байна. Бясалгал нь мэдрэлийн болон дархлаа тогтолцоонд олон ач тусыг үзүүлдэг.