Спортын үед уух шингэн болон электролит

Дасгал сургуулилтын үед нөхөж авах шаардлагатай бодисуудад:

• Ус
• Нүүрс-Ус
• Электролит, минералууд ордог.

Ус

Хэдий их хөлс гарна, төдий чинээ ус болон электолитээ нөхөж авах шаардлагатай

Дасгалаас 1-2 цагийн өмнө 450-600мл ус

Дасгалаас 15 минутын өмнө 250мл ус

Дасгалын үед 15-30 минут тутамд 125-250мл ус эсвэл электролиттэй шингэн уух хэрэгтэй. 

Харин дасгалын дараа хэдий их хэмжээний ус уух нь дасгалын өмнөх болон дараах жингээс хамаарна. 453г  тус бүрт 400-700мл ус нөхөж уух шаардлагатай. Мөн дасгалын дараа 4:1 хэмжээний нүүрс-ус, уураг агуулсан хоол идэх хэрэгтэй.

1 цагаас бага хугацаагаар дасгал хийдэг бол зөвхөн цэвэр ус уухад хангалттай. 

Нүүрс-Ус болон эрдсүүд

1 цагаас удаан хугацаагаар дасгал хийсэн тохиолдолд нүүрс-ус болон эрдэс агуулсан шингэнийг уух хэрэгтэй. 

Гэрийн нөхцөлд хийх спортын ундааны жор

Олон төрлийн спортын ундааны жор болон энэ ундаанд агуулагдах илчлэг, нүүрс-ус, натри, калийн хэмжээг судалж, тооцсоны үндсэн дээр 1 цагаас дээш хугацаагаар дасгал хийж байх үедээ уух спортын ундааны жорыг зохиолоо. 

·         Ус: 500мл хүйтэн, 220мл бүлээн (зөгийн балаа уусгах зорилгоор)

·         Жүржийн шүүс: 250мл

·         Зөгийн бал: 2 хоолны халбага

·         Давс (жамц давс байвал илүү сайн): ¼ цайны халбага

·         ½ нимбэгний шүүс (30мл)

Зөгийн балаа бүлээн усандаа уусгаж, дээрээс нь жүржийн шүүс, давс, нимбэгний шүүсээ хийж, хутгана.

Нийт 1 л. Илчлэг 248 ккал, нүүрс-ус 62 г, натри 504мг, кали 511 мг

Кофений нунтаг сүү бол химийн бодисуудын нийлбэр

Бидний кофендоо хийдэг нунтаг кофений сүү /coffee creamer/ нь сүү гэж нэрлэх боломжгүй, ихэнхдээ non-dairy буюу сүү агуулаагүй гэсэн шошготой байдаг. Бид найрлаганд нь юу агуулагдаж байгааг мэдэхгүй, хаанаас, яаж бий болсныг нь мэдэхгүй учраас тогтмол хэрэглэсээр байгаа. Тийм болохоор энэ тухай өнөөдөр судалж, бичихээр шийдлээ.

Кофений нунтаг сүүний гол найрлага нь натрийн казейнат /sodium caseinate/ гэдэг үнээний сүүнээс гаралтай бодис юм. Үүнийг гаргаж авахын тулд үнээний хатаасан сүүн дээр хлорт устөрөгчийг нэмж, казейнийг шар уснаас /whey/ нь ялгадаг. Тэгэхээр байгальд байдаггүй нийлэгжүүлж гаргаж авсан бодис нь кофений сүүний гол найрлага болдог байна.

Чихэрлэг амттай болгохын тулд эрдэнэ шишийн сиропыг нэмдэг. Сүүлийн үед ихэнх эрдэнэ шиш генийн өөрчлөлттэй болсон болохоор эрдэнэ шишийн сироп /corn syrop/high fructose corn syrop/ орсон бүтээгдэхүүн аль болох хэрэглэхгүй байх хэрэгтэй. Эрдэнэ шишийн сироп нь боловсруулсан чихэр, амттан, нарийн боов, салат амтлагч гээд маш олон төрлийн бүтээгдэхүүнүүдэд агуулагдсан байдаг.

Калийн фосфат /dipotassium phosphate/ нь органик бус, эрдсийн гаралтай давс бөгөөд ихэнхдээ Хятад, Энэтхэгт үйлдвэрлэгдсэн байдаг.

Моно болон диглицеридүүд нь өөхний хүчлүүдээс эмульсжүүлэн гаргаж авсан нэгдлүүд юм. Эдгээр нь транс-өөх тос /trans fats/ буюу бүтцийн өөрчлөлтөнд орсон өөх тос юм. Транс өөх тос нь зүрх судасны өвчний эрсдлийг нэмэгдүүлдэг, биед чөлөөт радикалын гэмтлийг ихээр учруулдаг гол найрлага.

Цахиурын хэт исэл /silicon dioxide/ бол байгальд ургамлын гаралтай хүнсний бүтээгдэхүүнүүдэд агуулагддаг. Үүнийг нунтаг бүтээгдэхүүнүүд нэгдэж, бүхэл болохоос сэргийлж нэмдэг. Бүтээгдэхүүний нийт жингийн 2%-аас бага хэмжээтэй агуулагдаж байж хүнд хор хөнөөлгүй байна. Гэхдээ хэмжээг нь голчлон заагаагүй байдаг тул хэр хэмжээтэй орсныг мэдэхэд хүндрэлтэй юм.

Sodium stearoyl lactylate нь хүнсний бүтээгдэхүүнүүдийг цийдмэгжүүлэгч бөгөөд кофенд хөөс үүсгэж, өөх тосыг орлох, задралаас сэргийлэх, амт оруулах зорилгоор хэрэглэдэг. Кофений дээр хөвдөг нөгөө хөөс маань тэгэхээр химийн бодис байх нь.

Шар буурцгийн лецитин /soy lecithin/ нь шар буурцгийн тос үйлдвэрлэх үйл явцад гарсан хаягдал бүтээгдэхүүн. Үүнийг гаргаж авахад гексан гэдэг химийн уусгагчийг хэрэглэх ба энэ нь мэдрэл хордуулах үйлчилгээтэй байдаг.

Найрлагын сүүлийн хэсгээр хиймэл амт, өнгө оруулагчдыг /artificial flavors and artificial color/ бичсэн байна. Таны хэрэглэх химийн бодисуудын тоо ингэж улам нэмэгдсээр л.

За ямар ч байсан та кофений сүү сүү биш химийн бодисууд гэдгийг ойлгож авсан байх. Нунтаг кофений сүүний оронд үнээний цэвэр сүү хэрэглэх, эсвэл сүүгүй уух нь хамгийн зөв аргууд болж таарах нь. Мөн гэрийн нөхцөлд янз бүрийн амттай кофений кремер хийх жоруудыгhttp://deliciouslyorganic.net/homemade-coffee-creamer/ хаягаас уншаарай.

Нээрээ л ажил дээр байгаа кофений нунтаг сүүний найрлагад дээрх бүгд агуулагдаж байна. Бөөн химийн бодисууд харагдаж байна. Та бас найрлагыг нь шалгаад үзээрэй.

http://foodtruthfreedom.wordpress.com/2012/03/18/non-dairy-coffee-creamer-makes-the-ick-list/

http://www.naturalnews.com/035784_coffee_creamer_hydrogenated_oils_HFCS.html

Ясны шөл бэлтгэх, түүний ач тус

Ясны шөл бэлтгэх

Ясны шөлний үндсэн түүхий эд нь яс юм. Яс нь мөлжүүртэй, мөлжүүргүй аль нь ч байж болно. Ясны шөл гаргахдаа үхрийн чөмөгт ясны булуу, хавирга, сээр, нуруу, ууцны ясыг ашиглана. Ясыг 8-12 см хэмжээтэй жижиглээд, хүйтэн усанд хийж, үхэр, тугал 3,5-4 цаг, гахай, хонь 2-3 цаг зөөлөн гал дээр чанана. Зарим эх сурвалжуудад загасны яс 2 цаг, хонь, тахианых өдрийн турш, харин үхрийн ясыг 24 цаг зөөлөн гал дээр чанана гэжээ. Шөнийн турш плиткээ асаана гэдэг нэг талаар аюултай учраас унтахаасаа өмнө плиткээ унтрааж, гадуур нь сайн ороогоод, таглаад, маргааш нь дахин зөөлөн гал дээр үргэлжлүүлэн буцалгаж болно. Амт оруулагч сонгино, сармис, лаврын навч зэргийг шөлийг гаргахаас 30-40 минутын өмнө хийнэ.

Зарчим:

·         Шөл гаргахдаа хүйтэн ус хийнэ.

·         Шөлийг буцалмагц галыг багасгаж, зөөлөн гал дээр чанана.

·         Шөлний нитгэл, тосыг байнга хамж авна.

·         Шөлийг шүүж, тунгалаг болгоно.

·         Саванд хийж, урсгал хүйтэн усанд тавиж хөргөнө.

·         Хөргөсөн байдлаар 7 хоног, хөлдөөж хэдэн сар хадгална.

·         Ус нь бага зэрэг хүчиллэг бол яснаас ус руу кальци, магни, фосфор, хүхэр зэрэг эрдсүүдийг гадагшлуулдаг. Ийм учраас бага хэмжээний цуу хийх хэрэгтэй.

Эрүүл мэндийн ач тус

• Үений эрүүл байдал нь холбоос, шөрмөс, ясны төгсгөлүүдэд байдаг коллаген ширхэгтэй их холбоотой. Коллаген гэдэг нь гликозамингликаныг оролцуулсан том биомолекул бөгөөд энэ нь үеийг эрүүл байлгадаг маш чухал молекул юм. Ясны шөл нь гликозамингликануудын агууламж өндөртэй. ГАГ-уудын нэг нь глюкозамин бөгөөд үүнийг агуулсан хүнсний нэмэлтүүдийг хүмүүс тогтмол хэрэглэж байгаа. Зөвхөн глюкозаминаас гадна ясны шөлөнд хондроитин, гиалуроны хүчил гэх мэт бусад ГАГ-ууд ч агуулагддаг.

• Ясны шөл нь үс, арьс, хумсыг маш сайхан болгодог. Үс, арьс, хумсны гол бүтэц болох коллагеныг маш олон төрлийн нэмэлт бүтээгдэхүүнүүд болон гоо сайхны бүтээгдэхүүнүүдээс хүмүүс хэрэглэдэг. Ясны шөлийг тогтмол ууснаар хямд үнээр, найдвартай, коллагенийг биедээ шингээх боломжтой.

• Гэдэсний салстыг эмчлэхэд шаардлагатай желатин нь ясны шөлөнд агуулагддаг. Желатин нь пролин, глицинээс тогтсон уураг юм. Гэдэсний салстын нэвчимтгий чанар ихэссэнээр харшил, аутоиммун өвчнүүдийн тохиолдол ихээр нэмэгддэг ба хэт нэвчимтгий байдлыг желатин нь бөглөж, засварлан, сэргээдэг байна. Желатин нь ходоодны шарх, чихрийн шижин, булчингийн болон халдварт өвчнүүд, шарлалтын үед хэрэглэхэд үр дүнтэй байдаг. Хүүхдийн сүүнд желатин нэмж өгөхөд хүүхдүүдийн хоол боловсруулах замын зовиурууд арилж байсан байна. Шийр, толгой зэрэг нь желатины агууламжаар бас их бөгөөд студенийг бага хэмжээгээр ч хэрэглэж байх нь эрүүл мэндэд тустай юм байна. Желатины найрлага дах глицин нь глутатион хэмээх маш хүчтэй антиоксидантын найрлагад ордог учраас бүх биеийн чөлөөт радикалын гэмтлээс сэргийлэхэд тустай. Ясны шөлний найрлагад агуулагдах глицин нь элэгний хорт бодисуудыг цэвэрлэж, зайлуулахад шаардлагатай байдаг. Бүх төрлийн хоргүйжүүлэх дэглэмүүдэд элгийг хамгаалж, элэгний үйл ажиллагааг дэмжих нь маш чухал байдаг. Тийм болохоор ясны шөлийг хэрэглэснээр глициныг авах боломжтой юм байна.

•  Махны хэрэгцээг бууруулна. Желатины хэрэглээ хангалттай байх нь махнаас авах уургийн хэрэгцээг 50 хүртэлх хувиар бууруулдаг байна.

• Үе мөчний, коллаген зэрэг нэмэлт бэлдмэлүүдийг хэрэглэхээс илүүтэйгээр ясны шөл гаргаж, шөлтэй хоолондоо тогтмол хэрэглэж байх нь эдгээр бэлдмэлүүдээс илүү үр дүнтэй, шингэцтэй, олон талын ач тустай, хямд байх юм байна.

Эх үүсвэр

http://www.slideshare.net/bal12/hool-uildverleliin-tehnologi-lekts-3

http://undergroundwellness.com/top-5-reasons-why-bone-broth-is-the-bomb/

http://www.westonaprice.org/food-features/broth-is-beautiful

http://www.healthextremist.com/bone-broths-health-benefits-and-how-to-make-bone-broth/

Чага мөөг

Чага мөөг

Латин нэр: Inonotus obliquus

Ерөнхий

Чага мөөг нь хус модон дээр шимэгчлэн ургадаг мөөг юм. Хагас дугуй хэлбэртэй, гаднаас харахад барзгар, хар өнгийн, олон тооны цууралт, хагархай, зураастай гадаргатай, завсраар нь улбар шаравтар хэм цухуйсан чулуу мэт хатуу бодис юм. Намар 9 сараас 6 сар хүртэл түүхэд тохиромжтой, 2 жилийн дотор чанараа алдахгүй.

Чага мөөг нь дэлхийн бөмбөрцгийн хойд хагаст АНУ, Канад, Оросын Сибир, Европын зүүн, хойд хэсэг, Солонгос, Монголд ургадаг эмчилгээний шинж чанартай мөөг юм. Оросын Холбооны Улсын Санктпетербургт Мөөг эмчилгээний төв байдаг ба энд чага, шийтаке зэрэг мөөгийг хавдрын эмчилгээнд хэрэглэдэг байна. Мөн Орос эрдэмтэн, судлаачид чага мөөгнөөс “Бифенгим” нэртэй бэлдмэл гаргаж авч, үүнийг ходоод, гэдэсний өвчин, хайрст үлдийн эмчилгээнд хэрэглэдэг байна. 

Чага мөөг

Найрлага

Идэвхитэй полисахаридууд (бета-глюканууд) нь дархлаа Т-эсийн идэвхи, эсрэг биеийн нийлэгжлийг нэмэгдүүлэх дархлаа сайжруулах үйлчилгээтэй. Түүнчлэн дархлааны үйл ажиллагаа ихэдсэн үед зохицуулах үйлчилгээ үзүүлдэг учраас псориаз буюу хайрст үлд өвчний эмчилгээнд үр дүнтэй байдгийг Орост хийгдсэн судалгаануудаар тогтоосон байна. Найрлагандаа элэг цэвэршүүлж, хоргүйжүүлж, хавдрын эсийн ургалтыг зогсоодог тритерпенүүд, хавдрын эсийг хордуулж устгадаг, үржлийг дарангуйлдаг бетулиний хүчлийг агуулдаг. Чага мөөг нь хус модноос бетулиний хүчлийг шимэгдүүлэн авч, өөртөө хуримтлуулж, хүний биед шимэгдэх хэлбэрт оруулдаг.

Үйлчилгээ

• Антиоксидант. Бета-глюкан, бетулиний хүчил гэх мэт антиоксидантуудын өндөр агууламжтай. Антиоксидант үйлчилгээ нь эсийн ДНХ гэмтэж, мутаци үүсч, хавдрын эс болон хувирахаас сэргийлдэг.
• Хавдрын эсрэг үйлчилгээтэй Бетулиний хүчлийн өндөр агууламжтай. Чага мөөг нь хус модноос шимт бодисуудыг шимэгдүүлэн авч, хүний биед шингэх хэлбэрт нь оруулдаг. Нэг жишээ дурьдвал Чага мөөг нь хус модны бетулин гэх тритерпенийг бетулиний хүчил болгон хувиргадаг. Бетулиний хүчил нь хавдрын эсийн өөрөө өөрөө устгах механизм /апоптоз/-ыг идэвхижүүлдэг. Мөн хавдрын эсийн ургалтыг удаашруулдаг байна. 
• Дархлаа дэмжих үйлчилгээ. Чага мөөгний найрлага дах бета-глюкан полисахарид нь анхан шатны хамгаалалт болдог дархлааны эсүүдийн үйл ажиллагаа, ясны чөмөгний үүдэл эсүүдийг идэвхижүүлдэг. Дархлааны үйл ажиллагааг тэнцвэржүүлж, дасан зохицох, ачаалал даах чадвар /адаптоген/, биеийн эсэргүүцлийг сайжруулдаг.  
• Үрэвслийн эсрэг үйлчилгээ. Чага мөөгний найрлага дах олон төрлийн бодисууд нь үрэвслийн эсрэг үйлчилгээ үзүүлснээр архаг үрэвсэлт өвчнүүд болон гэдэс үрэвсэлт өвчнүүдэд үр дүнтэй нь батлагдсан байдаг.
• Элэг хамгаалах, тархины цусан хангамж сайжруулах үйлчилгээтэй.
• Цусны сахар бууруулдаг учраас чихрийн шижинтэй хүмүүс хэрэглэдэг тустай.

Бэлдэх арга

Хөгширч үйрч байгаа чага нь эмчилгээнд тохирохгүй. Эрүүл модон дээрхийг нь түүнэ. Хатсан мод, модны доод хэсгийнхийг түүдэггүй. Чагаагаас өөр төрлийн мөөгийг түүж, бэлдэж болохгүй.Чаганы дотор талын цайвар зөөлөн, хөвсгөр хэсэг, модны холтсыг нь зайлуулна. Гадна талын хатуу хэсэг нь хурдан чийг татаж, хөгцөрдөг тул жижиглээд +50 дээшгүй халуунтай хуурай газар хатаана.

1.    Шинэ түүсэн, эсвэл хатаасан чагааг буцалгасан хүйтэн усанд 4-5 цаг дэвтээнэ. Мөөг усанд бүхэлдээ далд орсон байх шаардлагатай. Дэвтсэн мөөгийг үрэгч дээр үрж, эсвэл махны машинаар машиндан жижиглэнэ. Ингэж жижиглэсэн 1 стакан чага мөөгөн дээр 5 стакан буцалгасан бүлээн /+50 хэмээс илүүгүй/ ус хийгээд 2-3 өдөр хандална. Дараа нь хандыг давхарласан самбайгаар сайн шүүнэ. Гарсан өтгөн хандыг өмнө нь мөөгийг дэвтээсэн усан дээрээ хийнэ. Ингэж бэлдсэн хандыг ердийн нөхцөлд 5-6 өдөр, хөргөгчинд арай илүү удаан хадгалж болно. Хоол идэхээс хагас цагийн өмнө нэг аягаар өдөрт хоёроос гурван удаа, эсвэл хагас аягаар өдөрт зургаан удаа ууж хэрэглэнэ.

2.    Хатаасан, шинээр түүсэн мөөгийг нунтаглан, 1 цайны халбагыг 1 аяга 80-90⁰С халуун усанд хийж, 10-15 минут байлгаж, цай болгож ууж болно.

3.    Чага мөөгийг нунтаглан шилэнд хийж, дээр нь 40%-ийн архи далд орохуйц хэмжээгээр хийж, хутгана. Энэ бэлдмэлээ өглөө, оройд нэг нэг удаа сайн сэгсэрнэ. 1 сарын дараа бэлэн болох үед нь марлиар шүүж авна. Шүүж авсан эдээ хөлдөөгөөд (эсийн хана нь задлахад хүндрэлтэй байдаг), халуун усанд чанаж, усыг нь ширгээгээд, спиртэн хандтайгаа холиж, дуслаар хэрэглэнэ. Ойролцоогоор 40-60 дуслаар өдөрт 2-3 удаа хэрэглэнэ.

Анхаарах зүйл

Чага мөөгөөр эмчилгээ хийж байх үед сүү, ногоо голлосон хоол хүнс хэрэглэж, мах, өөх тосны хэрэглээг багасгана. Консерв, утсан мах, халуун ногоо, хиам г.м. зүйлсийг цээрлэнэ. Глюкозыг судсаар хийх, пенициллинийг уух болон тариулах хориотой.

Эх орныхоо хөрсөнд ургасан олон төрлийн ургамал, ногоо, мөөгийг хэрэглэн, эрүүлжих нь гадны ямар ч бэлдмэлээс илүү гэдэгтээ та бүхэн санал нийлэх байх.

Эх үүсвэрүүд:

http://www.naturalnews.com/033743_chaga_mushrooms.html

http://www.naturalnews.com/036974_chaga_mushroom_anti-cancer_tonic.html

http://www.naturalnews.com/028344_folk_remedies_cancer.html

http://en.wikipedia.org/wiki/Inonotus_obliquus\

http://www.youtube.com/watch?v=ZA_Q-uQoaFo
http://www.superfoods-for-superhealth.com/chaga.html

http://www.103.mn/archives/417

http://gazarshim.mn/tag/%D1%87%D0%B0%D0%B3%D0%B0-%D0%BC%D3%A9%D3%A9%D0%B3/

Жин хасахад туслах 15 хүнсний бүтээгдэхүүн

Та нарийн боов, амттан, гурилан бүтээгдэхүүнүүдийн оронд дараах хүнсний бүтээгдэхүүнүүдийг хэрэглэвэл жин хасахад тань илүү туслах болно. 

1. Өндөг. Өглөөд талх, нарийн боов идэхийн оронд өндөг идэхийг зөвлөж байна. Учир нь өндөг уургийн агууламж өндөр учраас та богино хугацааны дараа өлсөхгүй, илүү удаан цадсан мэдрэмжтэй байх болно. Илүүдэл жинтэй, тарган эмэгтэйчүүд өглөөний цайндаа талх, боовны оронд хутгасан 2 өндөг 2 зүсэм талх болон жимсний чанамал идэхэд дараагийн 36 цагт идэх хоол хүнсний хэмжээ нь хамаагүй бага байжээ. Уураг нь цусны чихэр огцом ихсэж, буурахаас сэргийлдэг.

2. Буурцаг. Холецистокинин нь жин хасахад туслах, хоолны дуршилыг бууруулдаг хоол боловсруулах даавар юм. Холецистокининыг илүү ихээр ялгаруулах нэг арга нь буурцаг юм. Уураг ихтэй учраас мөн цусны чихрийг тогтвортой байлгаж, хурдан өлсөхөөс сэргийлнэ.

3. Салат. Хоолныхоо өмнө шинэ ногооны салат идэх нь дараа нь идэх хоолны хэмжээг 12%-аар бууруулдгийг Пенн Улсын Их сургуулийн судлаачид тогтоожээ. Өдөрт 1 удаа ямар нэгэн ногооны салат иддэг хүмүүст С, Е аминдэм, фолийн хүчил, ликопин, каротиноид гэх мэт өвчнөөс сэргийлэх тэжээлийн бодисуудын түвшин их байдаг байна.

4. Ногоон цай. Гоолиг болгож, тураадаг найрлага нь каффейн биш. Харин бодисын солилцоо, өөхийг шатаадаг катехин хэмээх антиоксидант найрлага нь гол үйлчилгээтэй. Сүүлийн үед Японд хийгдсэн судалгаан дээр ногоон цайны катехиныг оолонг цайтай цуг ууж байсан 35 эрэгтэйн бодисын солилцоо нэмэгдэж, жин хасагдаж, биеийн жингийн индекс нь буурсан байна. Мөн муу холестерол буюу бага нягттай липопротеид холестеролын хэмжээ буурчээ.

5. Лийр. 1 дундаж хэмжээний лийрэнд 6г эслэг агуулагддаг. Харин дундаж 1 алим 3г эслэгтэй. Хоёулаа пектин хэмээх эслэгийг агуулдаг ба энэ нь цусны чихрийн хэмжээг бууруулж, хоолны хооронд юм идэхээс сэргийлдэг. Бразилд хийгдсэн судалгаагаар жин ихтэй эмэгтэйчүүд өдөрт 3 ш лийр идэхэд 3 овьёосны жигнэмэг идсэн эмэгтэйчүүдтэй харьцуулахад илүү их жин хассан байжээ.

6. Шөл. Бага хэмжээний мах идснээс шөл уух нь цадсан мэдрэмжийг төрүүлж, илүү их идэхээс сэргийлдэг.

7. Өөхгүй үхрийн мах. Оройн хоолондоо өөхгүй үхрийн мах, загасны мах идэх нь жин хасах гэж байгаа хүмүүст тохиромжтой. 1700 калори өдөрт идэх хоолны дэглэмд 220-280г үхрийн мах идсэн хүмүүс уураг багатай, адил илчлэгтэй хоол идэж байсан хүмүүсийнхээс жин нь илүү хасагдаж, өөхний хэмжээ нь буурч, булчингийн массын бууралт бага байжээ.

8. Оливийн тос. Екстра виржин оливийн тос нь дан ханаагүй өөхний хүчлийн агууламж өндөр ба энэ нь илчлэгийг шатаахад туслах болно. Оливын тосыг цөцгий, кремний оронд хэрэглэхэд бодисын солилцоог илүү ихээр идэвхижүүлж байжээ. Салатны амтлагч, талх дүрэх, ногоо хуурах гэх мэт оливийн тосыг өргөнөөр хэрэглэх хэрэгтэй.

9. Грейпфрут. 2006 онд 91 тарган эмэгтэйчүүдэд хийгдсэн судалгаагаар хоол бүрийнхээ өмнө өдөрт 3 удаа грейпфрут шүүс хэрэглэхэд 12 долоо хоногийн турш 1.3кг хасчээ. Жимсэнд агуулагддаг фитохимийн бодисууд нь инсулины түвшинг бууруулж, өөх ихээр хуримтлагдахаас сэргийлдэг.

10. Синнамон. Каш, овьёосон дээрээ бага зэргийн синнамон цацчихад хоолны дараа инсулин хэт ихсэхээс сэргийлдэг байна. Нэгэн судалгаагаар өдөрт 1/4 цайны халбага синнамон хэрэглэхэд цусны чихэр, холестерол, триглицеридийн түвшинг 2-р төрлийн чихрийн шижинтэй хүмүүст бууруулж байжээ.

11. Цуу. Шведэд хийгдсэн судалгаагаар цуунд талх дүрж идэхэд дангаар нь идсэнээс илүү гэдэс дүүрэх мэдрэмж төрдөг байна. Магадгүй цууны хүчил нь ходоодны гэдэс рүү хоол орох хугацааг уртасгаж, арай удаан хугацаанд гэдсийг дүүрэн байлгадаг.

12. Тофу. Лоуизана Улсын Сургуульд хийгдсэн судалгаанд хоолны өмнө идэх аппетайзерт тофу идэхэд тахианы махнаас илүү ихээр гэдэс дүүргэж, дараа нь идэх хоолны хэмжээг бууруулж байжээ. 

13. Самарнууд. Самар нь илчлэг ихтэй ч самар өдөр тутамдаа ихээр хэрэглэдэг хүмүүс бусдаасаа илүү туранхай байдаг байна. Тайван үеийн бодисын солилцоо 11%-аар ихэссэн нь илүү их илчлэгийг шатааж байна гэдгийг баталдаг. Мөн хушга гэх мэт самрууд нь омега-3 өөхний хүчлийг агуулдаг тул үрэвслийн эсрэг, зүрх судас, тархины үйл ажиллагаанд сайнаар нөлөөлнө. 

14. Эслэг ихтэй сереал. Өглөөний цайндаа сереал хэрэглэдэг бол аль болох эслэг ихтэйг сонгох нь хоолны дуршлыг бууруулна. 

15. Халуун чинжүү. Халуун ногоотой хоол тогтмол идэх нь жингээ хасахад тань туслах болно. Японд хийгдсэн судалгаагаар өглөөний цайндаа халуун чинжүүтэй хоол идсэн хүмүүсийн идэх өдрийн хоолны хэмжээ хэвийнхээс бага байдгийг тогтоожээ. Найрлаган дах капсаицин нь хоолны дуршилыг бууруулдаг. 

http://www.webmd.com/diet/features/15-foods-to-help-you-lose

Хавдраас сэргийлэх үйлчилгээтэй шөл

Хавдраас сэргийлэх энгийн, үр дүнтэй нэг арга нь өдөр тутам байцааг идэх. Байцаа нь брокколи, цэцэгт байцаа, буржгар байцаа зэрэгтэй нэг бүлийн ногоо юм. Эдгээр ногоонууд нь эсийг хоргүйжүүлэх энзимийг агуулдаг тул чөлөөт радикал, хорууд болон карциногенуудыг устгадаг.

Байцаа болон энэ бүлийн бусад ногоонууд нь индол-3-карбинол хэмээх бодисыг агуулдаг ба энэ нь эсийн хоргүйжүүлэлт, ялангуяа эстрогений хоргүйжүүлэлтийг идэвхижүүлдэг. Ялангуяа эстроген даавар нөлөөт хавдар болох хөхний хавдраас сэргийлэх гол үйлчилгээтэй юм.

Орц:
2 аяга хэрчсэн байцаа
1 лаазтай chickpea
1 том төмс
1 сонгино
2 хумс сармис
1/4 аяга силантро (cilantro)
4 аяга ногооны, ясны, махны шөл эсвэл цэвэр ус
Далайн давс, хар перец амт оруулах хэмжээгээр

Заавар:
4 аяга шөл эсвэл усандаа силантро, давс, перецнээсээ бусад ногоонуудаа хийж буцалгана. 3 аяга шөлөө блендэрт хийж, зутан болгоно. Давс, перецээ өөрийн хүссэн хэмжээгээр хийж, амтална.

Зургийг дараах хаягаар орж харна уу.
http://drbenkim.com/anti-cancer-soup-recipe

Яагаад хүнсний нэмэлт бүтээгдэхүүн хэрэглэх шаардлагатай вэ?

1.    Хөрсний шимт бодисын агууламж буурснаас бидний хоол тэжээл дэх тэжээлийн бодисуудын хэмжээ буурсан байдаг. Дэлхийн ихэнх бүс нутагт газрын хөрсөнд ихээр ногоо, тарьж, малыг ихээр бэлчээрлүүлж байгаа. Энэ нь хөрсний чанарыг муутгадаг. Ихэнх газарт хөрс чанаргүй болж, сайжруулахад улам хүндрэлтэй болж байгаа. Энэ нь хүнсний бүтээгдэхүүнийг олон төрлийн эрдэс, аминдэмийн агууламж багатай болгоход хүргэдэг.

2.    Эрлийзжүүлсэн ургац шим тэжээлийн бодисын агууламж багатай байдаг. Үүнийг өнөөдөр хаа сайгүй хэрэглэдэг бөгөөд нэг акр газарт урьдынхаас илүү их ногоо тарьснаас 100 жилийн өмнөхөөс тэжээлийн бодисуудын агууламж хэд дахин буурсан. Энэ үзүүлэлт АНУ болон дэлхийн бусад бүх орны судалгаанд гарч ирдэг. Жишээ нь 100 жилийн өмнө тарьж байсан хэмжээнээс 10 болон түүнээс дээш дахин их хэмжээний улаан буудай, гурил нэгж талбайд тариалагдаж байгаа. Гэхдээ хөрс 10 дахин их эрдэс, аминдэмийн агууламжгүй. Үүний үр дүнд өнөөгийн улаан буудайн уургийн агууламж 6%-тай байхад 100 жилийн өмнө 12-14%-ийн агууламжтай байжээ.

3.    Өнөөгийн хэрэглэж байгаа бордоонууд хангалттай хэмжээний бичил элементээр хангаж чаддаггүй. 100 жилийн өмнө малын өтөг, бууцыг бордоо болгон ихээр ашиглаж байв. Харин одоо суперфосфатын бордоог үүний оронд хэрэглэх болжээ. Эдгээр нь азот, кали, фосфорыг голчлон агуулдаг бөгөөд бичил элементээр дутмаг юм. Хэдий харамсалтай ч гэсэн үнэн. Бидний ургац стероид уудаг хүнтэй адил болсон-идэвхижсэн боловч хүчтэй, аюулгүй биш юм. Суперфосфатууд өсөлтийг дэмжигч мэт үйлчилдэг. Энэ нь хөрс болон ургацын эрдсийн хэмжээг ихээр буурахад хүргэдэг.

4.    Одоо цагт дэлхий даяар хэрэглэх болсон пестицид, гербицид нь хүнсний бүтээгдэхүүнийг зарим талаар хортой болгож, хөрсний бичил биетүүдийг гэмтээдэг. Эдгээр нь хоёулаа хөрсний тэжээлийн бодисуудын хэмжээг бууруулдаг. Хөрсний бичил биетүүд нь эрдэс болон бусад элементийг ургамлаас хөрсөнд бий болгоход шаардагддаг. Олон төрлийн пестицид, гербицид болон бусад химийн бодисуудыг талбайд хэрэглэснээр эдгээр хөрсний бичил биетүүд үүргээ бүрэн гүйцэтгэх чадваргүй болж, ногоо, жимсны найрлага дахь тэжээлийн бодисуудын хэмжээ буурдаг.

Мөн бид пестицидийн үлдэгдлийг боловсруулж, ялгаруулахад нэмэлт тэжээлийн бодис шаардагддаг учраас бидний биедээ хэрэглэх хэмжээнээс тодорхой хэмжээгээр зарцуулах шаардлагатай болдог. Ихэнх пестицид нь бидний биеийг хордуулах химийн бодисууд байдаг. Зарим нь хүний биед аажмаар хуримтлагддаг хар тугалга, арсени болон бусад хорт металлуудыг агуулдаг.

5.    Хол зайд тээвэрлэх болсноос тэжээлийн бодисуудын агууламж буурна. Хүнсний ногоо, жимсийг хурааж авсан цагаас эхлэн тэжээлийн бодисуудын хэмжээ буурч эхэлдэг. Өнөөдөр ихэнх ногоог хүн ам оршин суудаг газраас хол тарьж, олон хоног тээвэрлэгдэн байж хүмүүст хүрдэг. Дээр нь нэмээд жимсийг дэлхий даяар тарааж, хүргэхэд шинэ мэт байлгахын тулд химийн бодисоор шүршиж, туяагаар шарж, боловсруулдаг.

6.    Хоолыг хэт боловсруулснаас улаан буудай, гурил, будаа, сүүн бүтээгдэхүүнүүдийн доторх шимт бодисуудын агууламж ихээр буурдаг. Улаан буудайг цагаан гурил болгоход найрлагынх нь магнийн 80%, цайрын 70-80%, хромын 87%, манганы 88%, кобалтын 50%-ийг ялгадаг. Чихрийн нишингэнээс цагаан элсэн чихрийг гаргаж авахын тулд магнийн 99%, хромын 93%-ийг ялгадаг. Будааг цагааруулахдаа цайр, хромыг 75% бууруулдаг. Энэ нь зөвхөн цөөн тооны хүнсний бүтээгдэхүүнд яригдаж байгаа тоо юм. Хадгалах арга нь боломжийн, түүж, барьсныхаа дараа богино хугацаанд хадгалсан учраас шинээр нь хөлдөөсөн жимс, жимсгэнэ, шинээр нь лаазалсан сардин загас тийм ч муу хүнсэнд орохгүй. Гэхдээ хамгийн тэжээллэг, цэвэр хүнсэнд шинээр нь барьж, түүж түргэн хугацаанд хэрэглэсэн бүтээгдэхүүнүүд ордог. Сүү, сүүн бүтээгдэхүүнийг ариутгах явцад кальци,фосфор болон зарим уургийн биологийн үнэлгээ (bioavailability) буурдаг.

7.    Хүнсэнд хиймэл амт, үнэр, өнгө оруулагч, тогтворжуулагч зэрэг нэмэлт бодисуудыг хэрэглэх нь тэжээлийн бодисын агууламжыг улам буурахад хүргэдэг. Зарим нь эрүүл мэндэд хор хөнөөлгүй байж болох ч хортой, мөн шимт бодисуудын агууламжийг бууруулахад хүргэдэг.

8.    Хоол боловсруулалт болон тэжээлийн бодисуудын шимэгдэлт алдагдах. Одоо цагт бараг л хүн бүрийн хоол боловсруулах чадвар муудсан. Энэ нь тэжээлгүй, чанар муутай хүнс хэрэглэснээс болон цэвэршүүлж, боловсруулсан хүнс, эдгээрийн найрлага дахь химийн бодисуудтай холбоотой. Мөн үүнд хоол боловсруулах энзимүүдийн ялгаралт бага байх, гэдэсний бичил биетний орчны өөрчлөлт нөлөөлдөг. Үр дүнд нь тэжээлийн бодисуудыг шимэгдүүлэн авах чадвар илүү буурна. Тийм болохоор хүн бүрын хоол боловсруулалтыг сайжруулахад дэмжлэг болох нэмэлтүүдийг хэрэглэх хэрэгтэй.

9.    Стресстэй, яаруу амьдралын хэв маяг. Энэ нь хоол боловсруулалтыг муутгаж, илүү их тэжээлийн бодисуудыг зарцуулах нөхцлийг бүрдүүлдэг. Бие махбод ямар нэгэн стресстэй учрахад цайр хэдхэн минутын дотор биеэс ялгарна. Стресс нь дээрх нөхцөл байдлууд дээр улам нэрмээс болдог.

10.  Архаг болон цочмог халдварт өвчнүүдийн үед ихэнх тэжээлийн бодисуудын хэрэгцээ, хэрэглээг нэмэгдүүлдэг.

11.  Бүх хүүхэд өнөөдөр ямар нэгэн тэжээлийн бодисын дутагдалтай төрж байна. Нөгөө талаар төрсөн цагаасаа эхлэн нэмэлтээр ямар нэгэн шимт бодисыг авах шаардлагатай төрж байгаа. Эхээс хүүхдэд тэжээлийн бодисууд хангалттай хэмжээгээр очихгүй байгаагаас хүүхэд дутагдалтай төрж байгаа гэдгийг сайн ойлгох хэрэгтэй.

12.  Вакцин болон бусад эмийн бодисуудыг хүмүүс ихээр хэрэглэснээс тухайн хүний тэжээлийн ерөнхий байдлыг алдагдуулдаг. Антибиотик, хүчил саармагжуулагчид, хүчиллэг бууруулагчид, аспирин зэрэг олон төрлийн эмүүд хоол боловсрон, шингэх үйл явцад нөлөөлдөг.

13.  Агаар, ус болон хаа сайгүй байрлах химийн бодис, хорт металлуудыг хоргүйжүүлэхэд тэжээлийн бодисуудыг ихээр шаардаж, хэрэглээг нэмэгдүүлдэг.

14.  Зарим эмнэлгийн процедурууд нь тэжээлийн бодисуудын хэмжээг бууруулдаг. Жишээ нь бүх төрлийн мэс засал, рентген гэх мэт шинжилгээнүүд үүнд багтана. Мэс засал нь стрессийг үүсгэж, эмийн бодисуудыг ихээр хэрэглэхэд хүргэдэг.

15.  Амьдралын тусгай үеүдэд илүү их тэжээлийн бодисууд хэрэгтэй. Бүх насны хүүхэд, өндөр настан, тамирчид, өвчтэй хүмүүс, жирэмсэн хөхүүл эмэгтэйчүүд, архи хэрэглэгчид, цагаан хоолтон, бүх төрлийн стресст өртсөн хүмүүс бусдаас илүүтэйгээр шимт бодисуудын хэрэгцээтэй байдаг.

http://drlwilson.com/Articles/SUPPS-WHY%20TAKE.HTM