Хад жимсний пирог

Байгалийн жимсгэнээр анх удаагаа пирог хийж үзлээ. 

Хадны пирог 

Сууринд:
-170г гурил (ойролцоогоор 1 1/4 аяга)
-Чимх давс
-100г давсгүй масло (7 хоолны халбага)
-1 өндөгний шар
-2 халбага хүйтэн ус

Жимс:
-350г хад жимс
-120г элсэн чихэр (3/4 аяга)
-2 хоолны халбага гурил (эрдэнэ шишийн гурил хийж болно)
-Сүү болон элсэн чихэр бага зэрэг

Заавар:
Суурийг хийхдээ гурил давсаа шигшээд, дээр нь маслоо дөрвөлжилж хийгээд хурууныхаа үзүүрээр имэрч, бутална. Өндөгний шарыг 2 хоолны халбага устэй хольж масло, гурилтайгаа холиж, бүхэл болгоно. 2 хувааж, нэг хэсгийг нь сууринд, нэг хэсгийг нь дээр нь бүрэхээр илдэнэ.

 

Зуухыг 170-180С-д халаана. 

Жимсийг саванд хийж, дээр нь элсэн чихэр, гурилаа хийгээд хутгаж, бэлдсэн суурин дээрээ хийгээд дээд талаар нь бүрнэ. 

Бүрсэн гурилаа сүүгээр бүрж, бага зэргийн элсэн чихэр цацна. 

35-40 минут жигнэх бөгөөд доторх жимс нь хөөсөрч, гурил нь алтлаг шар болтол болгоно. 

Жорыг эндээс авав. 

Гэрийн нөхцөлд гранола хийх арга

Овьёосыг өдөр тутамдаа хэрэглэх нэг арга нь гранола хийх юм. Овьёос нь эслэгийн агууламж их тул өтгөн хатахаас сэргийлэх, өөх-тосны шимэгдэлтийг багасгах ба аминдэм, эрдсээр баялаг тул тэжээллэг өглөөний цай болдог. 

Орц: 

-4 аяга овьёос (rolled oats, геркулес)

-100 г самар (siesta hazelnut самар хийсэн, ямар ч самар өөрийн хүссэн хэмжээгээр хийж болно)

-100 г үзэм (хатаасан жимснүүдээс өөрийн сонголтоор хийж болно)

-1 цайны халбага синнамон (хийхгүй ч байсан болно)

 Шингэн орцонд: 

-Агч модны сироп (maple syrup) 125мл буюу тал аяга (байхгүй бол оронд нь зөгийн бал хийж болно, өтгөн зөгийн балыг бага зэрэг халааж байгаад шингэвтэр болгоод бусад орцуудтай холино)

-2 хоолны халбага ургамлын тос

-2 хоолны халбага зөгийн бал

-Шингэн ванилла 1 цайны халбага

Заавар

Шингэн орцуудыг жижиг саванд хольж, овьёосыг самар, синнамонтой холино.

Шингэн орцуудаа овьёосны холимогтоо хийгээд листэн дээрээ нимгэн тарааж, урьдчилан 150 орчим градуст халаасан зууханд хийж, 20 орчим минут болгоно. 

Болсны дараа үзмээ нэмж, хутгаад гранола бэлэн болно. 

Хэрэглэх арга

Өглөөний цайнд сүүнд хийж идэхэд тохиромжтой. Мөн өдрийн аль ч цагт амны зугаа болгон хэрэглэнэ. 

Артишок ургамлын ач тус

Артишокыг хоолонд хийж идэх болон артишокын ханд хэлбэрээр олон төрлийн өвчин зовиурын үед хэрэглэдэг. Артишокыг хэрэглэснээр цусны холестеролыг бууруулах, зүрх судасны өвчнөөс урьдчилан сэргийлэх, бие махбодыг хоргүйжүүлэх, элэг хамгаалах үйлчилгээнүүдийг үзүүлдэг. 

Эрүүл мэндэд үзүүлэх ач тус

• Элэг, цөсний өвчнүүд холестерол ихдэлттэй хавсарсан үед цөс ялгаралтыг сайжруулж, өөх тосны шимэгдэлтийг дэмжиж, гэдэсний ханыг хамгаалах үйлчилгээ үзүүлдэг. 
• Хоол хүнс, усанд агуулагдах хортой бодисууд элгэнд шүүгдэж, цөстэй цуг гадагшилдаг тул цөс хэвийн гадагшлах нь биеийг хоргүйжүүлэн цэвэрлэхэд маш тустай. Цөс нь давхар өтгөн гадагшлуулдаг. 
• Холестерол ихэдсэн үед аюулгүй, хоргүй, байгалийн эмчилгээ болдог. Артишок нь холестеролыг цөс болон хувиргаж, биеэс гадагшлуулдаг. БНЛП буюу муу холестеролыг бууруулж, ИНЛП буюу сайн холестеролыг нэмэгдүүлдэг.  
• Мөн кали ихтэй тул даралт бууруулах үйлчилгээ үзүүлнэ. 
• Антиоксидантын өндөр агууламжтай тул хавдар, хөгшрөлт, зүрх судасны өвчнөөс сэргийлнэ. 
• Дархлаа дэмжиж, олон төрлийн халдварт өвчнөөс сэргийлэхэд тусална. 
• Элэгний эд эсийг хамгаалах, нөхөн төлжүүлдэг силимариныг агуулдаг тул элэгний үрэвсэл, хатууралтай өвчтнүүд тогтмол хэрэглэх хэрэгтэй. 
• Шартсан үедээ артишок ханд хэрэглэх буюу артишок идэх нь хордлогыг богино хугацаанд тайлахад тустай. 
• Хоол боловсруулах замын зовиурууд, өтгөн хаталт, суулгалт, гэдэс цочролын хамшинж, хоол боловсруулалт муудсан тохиолдлуудад хэрэглэхэд үр дүнтэй. 
• 1 ш артишок нь насанд хүрэгчдийн өдрийн хэрэгцээний эслэгийн 1/4-ийг хангах боломжтой тул өтгөн сайн гадагшлуулна. Мөн С аминдэм, кали, фолийн хүчил, магнигаар баялаг. 

Эх үүсвэрүүд:

http://foodmatters.tv/articles-1/why-we-should-all-be-eating-more-artichokes

Д аминдэмийн тухай товчхон

Д аминдэм судлалаар дэлхийд тэргүүлэгч Dr. Holick-ийн Д аминдэмийн талаар хэлсэн ишлэлүүдээс

·         Д аминдэм нь эрүүл бат бөх шүд, яс, булчин бий болгох, эрүүл хэвээр хадгалахад маш чухал үүрэг гүйцэтгэдэг.

·         Д аминдэмийн дутагдал нь кесарын хагалгаа хийх магадлалыг дээшлүүлдэг.

·         Жирэмсэн эмэгтэйчүүд мультивитамин (ихэнхдээ 400ОУН Д аминдэм агуулдаг)-ийг оролцуулан нийт 1000ОУН Д аминдэм өдөр тутамд хэрэглэж байх хэрэгтэй.

·         Хөхүүл эмэгтэйчүүд өдөрт 4000-6000ОУН Д аминдэм хэрэглэвэл хүүхэд шаардлагатай хэмжээний Д аминдэмээ бүгдийг хөхний сүүгээр дамжуулан авч чадна.

·         Нярай хүүхдүүд төрсөн цагаасаа эхлэн Д аминдэм хэрэглэх хэрэгтэй

·         Д аминдэмийн агууламж өндөртэй хүнс тийм ч их байдаггүй. Байгалийн /фермд үржүүлсэн биш/ яргай загас 1 порцондоо /100г/ ойролцоогоор 500-1000ОУН Д аминдэм агуулдаг нь хүний өдрийн хэрэгцээнд хүрэх төдий хэмжээ юм.

·         Байгалийн /фермд үржүүлсэн биш/, зэрлэг яргай загас нь Д аминдэмээ байгаль дээрх эх үүсвэрүүдээс авдаг бол фермд үржүүлсэн яргай загас 1 порцондоо 100-250ОУН хэмжээгээр л агуулдаг.

·         Зун цагт нарны хэт ягаан туяа-В нь Д аминдэм арьсан үүсэхэд оролцдог.

·         Өвлийн цагт экватороос холдох тусам хэт ягаан туяа багасч, арьсан дээр үүсч чадахгүй болдог.

·         Хойд өргөргийн 35 градусаас хойшоо оршдог орнуудад амьдардаг /Улаанбаатар хойд өргөргийн 47 градуст оршдог/ бол 11 сараас 2 сарын хооронд Д аминдэм үүсэх боломжгүй.

·         SPF 15-аас дээш нарны хамгаалалт хэрэглэх нь Д аминдэм нийлэгжүүлэх процессийг 99% бууруулдаг.

·         Нас явах тусад нарны гэрлийн нөлөөгөөр Д аминдэм үүсэх чадвар буурдаг. 70 настай хүн 20 настай хүнээс Д аминдэм нийлэгжүүлэх чадвараараа 70% бага байдаг. Тэгэхээр өндөр настнууд нарны гэрлээс илүүтэйгээр аминдэмийн нэмэлтийн тусламжтай Д аминдэмээ нөхөх хэрэгтэй.

·         Таргалалт нь Д аминдэмийн хэрэгцээг нэмэгдүүлэхийн хажуугаар өөхний эсүүдэд Д аминдэм хуримтлагдаж, бусад эд эсэд хангалттай хэмжээгээр очихоос сэргийлдэг.

·         Ихэнх хүмүүс, ихэнх газар нутагт зуны улиралд гар, хөлөө долоо хоногт 2-3 удаа 5-15 минут шарахад хангалттай хэмжээний Д аминдэм үүсдэг. Харин энэ хугацааны дараа нарны хамгаалалттай тос түрхэж арьсаа эрт хөгшрөх, арьсны хавдраас хамгаалж болно.

·         Д аминдэмийн түвшинг тогтоох цусны шинжилгээ нь 25-гидрокси Д аминдэмийн хэмжээг тодорхойлох юм.

·         Dr. Holick бүх насанд хүрэгчид болон хүүхдүүд өдөрт хоол хүнс, мультивитамины нэмэлтээс гадна 1000ОУН Д аминдэм хэрэглэж байх хэрэгтэй гэж үздэг.

·         Д аминдэмийн дутагдал нь, зуны улиралд хүртэл, маш түгээмэл.