Овьёостой жигнэмэг

Овьёосны жигнэмэг

 Орц

-1 аяга масло
-1 аяга элсэн чихэр
-2 өндөг
-1,5 аяга гурил
-1 цайны халбага хүнсний сода
-1 цайны халбага давс
-3 аяга овьёосны нэвс

Дараалал

1. Дунд зэргийн хэмжээтэй саванд цөцгийн тос, элсэн чихрээ миксердэнэ. Өндгөө 1, 1-ээр нь нэмнэ. Гурил, хүнсний сода, давсаа өөр саванд холиод өмнөх зуурмаг руугаа нэмнэ. Дээрээс нь 3 аяга овьёосны нэвсээ нэмнэ. Зуурмагаа бүтээгээд хөргөгчинд хамгийн багадаа 1 цаг байлгана.

Жигнэмэгээ листэн дээрээ тавьсан байдал

2. Зуухаа 190С-д халаана. Листэн дээрээ бор цаас, хөнгөн цагаан цаас тавьж, зуурмагаа хушганы хэмжээтэй болгоод листэн дээрээ тавина. Зуурмагаа хавтгайлж, дарна.

3. Халаасан зууханд 8-10 минут болгоно. 10-20 минут хөргөсний дараа идэж болно. 

Овьёосны жигнэмэг болсны дараа

Тэмдэглэл: Дээрх бол яг хийх заавар нь. Гэхдээ одоогоор миксергүй байгаа учраас эхлээд маслоо хайлуулаад, элсэн чихрээ нэмсэн. Бага зэрэг хөргөж байгаад өндгөө хийсэн. Мөн зуурмагаа 1 цаг хөргөгчинд байлгаагүй, шууд хавтгайлан хийсэн. Зарим жигнэмэг дотор сүүтэй шоколад жижиглэн хийсэн. Үзэм нэмж хийж болно. Гэхдээ ямар нэгэн асуудалгүй болсон. 

Сүүтэй амтат талх

Сүүтэй, зөөлөн, амтат талх

Орц:
- 180 мл сүү (40 градус буюу бага зэрэг халуун)
- 2 1/4 цайны халбага исгэгч
- 1/4 аяга элсэн чихэр
- 2 өндөг 
- 1/4 аяга масло (60г орчим)
- 3 1/4 аяга гурил (450 грамм)
- 1 цайны халбага давс

Хийх арга:
Сүүгээ бага зэрэг халаагаад дээр нь исгэгч, элсэн чихэр, өндгөө нэмнэ. Гурил, давсаа өөр саванд хийж, сүүтэй холимогоо гурил дээрээ нэмж, зуурна. 1 цаг орчим амраасны дараа хэвлээд, дахин 30-40 минут амраасны дараа 180С-д 30-35 минут болгоно. 

Жорыг эндээс авч, бага зэрэг өөрчлөв. 

Сүүтэй зөөлөн талх, хажуу талаас нь амталгаа хийчихсэн

Шоколадтай кексний жор

Шоколадтай кекс, хялбар жороор

 
Орц:

• 3/4 аяга цөцгийн тос/масло, өрөөний температурт байгаа
• 3/4 аяга кокоа нунтаг
• 3/4 аяга гурил
• 1/2 цайны халбага хөөлгөгч/baking powder
• 1/4 цайны халбага давс
• 1 аяга элсэн чихэр
• 3 том өндөг
• 1/2 аяга цөцгий

Хийх дараалал:

1. Зуухаа 175 градуст халаана. Хэвээ бор эсвэл хөнгөн цагаан цаасаар бүрнэ. 
2. Дунд зэргийн хэмжээтэй саванд кокоа, гурил, хөөлгөгч, давсаа хийж, хутгана. Өөр саванд масло, элсэн чихрээ зөөлөн болтол нь миксердэнэ. Өндгөө нэг нэгээр нь хийж, хийснийхээ дараа бүрт миксердэнэ. Дараа нь гурил болон зөөхийгөө бага багаар ээлжлэн хийнэ. 
3. Зуурмагаа хэвэндээ хийгээд 30-35 минут орчим болтол нь жигнэнэ. Зуурмаг дээрээ дарж үзэхэд буцаж ойж байвал болсон гэсэн үг. Өөрөөр шүдний чигчлүүр хийгээд хуурай гарч ирвэл болсон гэж үзнэ. Болоогүй байвал зуурмагны шингэн гарч ирдэг. Болсны дараа 10 минут хөргөнө.

Нунтаг сахараар хийсэн icing буюу бүрэх сироп

Жорыг эндээс Англи хэл дээр харж болно. Кексний амт их гоё боллоо. Зөөлөн, бутарсан, амт нь яг гоё таарсан байна.

Кремний оронд 2 хоолны халбага сүүнд 9 хоолны халбага нунтаг элсэн чихэр хийж, icing sugar буюу чихрийн сироп хийж бүрлээ. 2 халбага сүүн дээрээ нунтаг элсэн чихрээ 1, 1-ээр нь хийж, хутгана. Яг жор дээрээ бол 1-2 хоолны халбага сүүн дээр 1 аяга нунтаг элсэн чихэр /16 хоолны халбага гэсэн үг/ хийхээр байсныг өөрчлөв. Чихрийг багасгаж хийлээ. Тэгтэл их гоё болсонгүй. Чихэр нь их байх юм бол өтгөрөөд гоё болох юм байна. Оригинал жорыг эндээс харж болно. Whipped cream буюу сүүн крем, маслон крем, шоколадтай крем гэх мэт өөрийн хүссэн кремээрээ бүрж болно.


Брауний/Brownie

-1/2 аяга масло

-1 аяга элсэн чихэр

-2 өндөг

-1/3 аяга нунтаг какао

-1/2 аяга гурил

-1/4 цайны халбага давс

-1/4 цайны халбага baking powder

Заавар

Маслоо хайлуулаад дээр нь элсэн чихрээ нэмж хутгана. Өндгөө нэг нэгээр нь хагалж хийгээд дээр нь гурил, какао, давс, baking powder-ээ хийгээд хутгасны дараа 175С-д халаасан зууханд 25-30 минут болгоно. 

 

Ургамлын ханд бэлтгэх тухай

Эрүүл мэндээ бэхжүүлэхэд ургамлыг хэрэглэх арга

 

Хэрэглэгдэх материал

Ургамлын ханд бэлтгэхэд шаардагдах материал

• Хатаасан эсвэл шинэ ургамал 
• 40-50 градусын сайн чанарын архи
• Тагтай шилэн сав
• Ариун марль 
• Бор шилэн сав
• Шошго наах цаас, үзэг

 Хатаасан болон шинэ ургамлаар ханд/extract бэлтгэх:

1. Маш сайн чанарын хатаасан ургамал худалдаж авна. Нунтагласан ургамал хэрэглэхгүй байх хэрэгтэй. Учир нь ханданд тунадас үүсэх магадлалтай. 
2. Хэрвээ хатаасан ургамал хэрэглэх бол 1 хэсэг ургамал дээр 3 хэсэг спирт /ургамал:спиртийн харьцаа 1:3/ байх хэрэгтэй.  Харин шинэ ургамал хэрэглэх бол 1:1 харьцаагаар хийвэл тохиромжтой.
3. Ургамлыг ариутгасан цэвэр шилэнд хийнэ.
4. Спиртээ ургамал дээрээ нэмж, ургамлаа спиртийн холимог дотор бүрэн ортол дарж өгнө.
5. Шилээ таглаад, сайн сэгсрээд харанхуй газар 2-6 долоо хоног хадгална. Өдөр бүр 1-2 удаа сайн сэгсэрнэ. 
6. 2-6 долоо хоногийн дараа ариун марлиар ургамлыг шүүж аван, хандыг бор шилэнд хийж, ургамлын нэр, он сар өдөр гэх мэт шаардлагатай мэдээллийг бичиж наагаад хөргөгчинд хадгална. 4 жил хүртэл хугацаагаар хадгалж болно.
7. 1 цайны халбагаар өдөрт 3 удаа ууна.
8. Хэд хэдэн ургамлыг нэг дор хандалж болно.

Ургамлын хандаа шүүх процесс

Эх сурвалж:
http://www.naturesapotheke.com/howtomakeyourownherbaltinctures.htm
http://www.oregonswildharvest.com/archived_recipes/making_your_own_extract_with_dried_herbs

Палео хоолны дэглэм

Палеолитик буюу Палео хооллолт нь одоо цагаас 2 саяаас 10000 жилийн өмнөх хүмүүсийн идэж байсан шиг хүнсний зүйлүүдийг л идэхийг зөвлөдөг хоолны дэглэм /diet/ юм. Ойролцоогоор 10000 жилийн өмнөөс газар тариалан хөгжсөн гэж үздэг бөгөөд энэ үеэс өмнө үр тарианы бүтээгдэхүүнийг өргөнөөр хэрэглэдэггүй байсан учраас энэхүү хооллолтонд үр тариа, гурил, будаан бүтээгдэхүүн ордоггүй онцлогтой.

Палео хооллолтын үед ямар хүнсний бүтээгдэхүүн хэрэглэхийг дараах пирамидаас харж болно. Пирамидийн хамгийн доод суурь хэсэгт уураглаг хүнсний бүтээгдэхүүнүүд болох бүх төрлийн мах, загас, далайн амьтад, өндөг багтдаг. Харин голын хэсэгт буюу ихэнхдээ идэх хүнсэнд бүх төрлийн цардууллаг бус жимс, хүнсний ногоо юм. Пирамидын дээд хэсэгт бага зэргийн самар, коконат буюу далдуу модны тос, оливийн тос зэрэг орно. Тэгэхээр энэ пирамидад байгаа л хүнснүүдийг хэрэглэнэ гэсэн үг.

Палео хүнсний пирамид

Орчин үеийн хооллолтонд гол байр суурь эзэлдэг гурилан бүтээгдэхүүн, цэвэршүүлж, боловсруулсан хүнсний бүтээгдэхүүнүүдээс алийг нь ч хэрэглэж болохгүй. Дараах зурагт идэж болох болон болохгүй хүнсний бүтээгдэхүүнүүдийг зураг байна.

Идэж болох, болохгүй хүнс

Палео хооллолтын жишээ жорууд

Өглөөний цай

Олон төрлийн ногоотой омлет

Өдрийн хоолонд ногооны салаттай цуг үхэр, тахиа, загас, гахайны махтай идэх

Оройн хоол

Ууранд жигнэсэн ногоонууд шарсан тахианы мах

Дессерт

Бүх төрлийн жимс, жимсгэнэ идэж болно. 

Гадилтай талх

Орц:

Бүрэн болсон гадил

-1 аяга элсэн чихэр

-8 хоолны халбага масло

-2 том өндөг

-3 гадил 

-1 хоолны халбага сүү

-2 аяга гурил

-1 цайны халбага хөөлгөгч /baking powder/

-1 цайны халбага хүнсний сода

-1 цайны халбага давс

 

Гадилтай талх, нарийн боовонд бүрэн болсон гадил хэрэглэдэг. Бүрэн болсон гэдэг нь гаднаа хар хар цоохортой болсон гэсэн үг юм. 

 

Заавар:

165C дээр зуухаа халаана. 

Элсэн чихэр, маслоо том саванд хөвсгөр зөөлөн болтол миксердэнэ. Өндгөө нэг нэгээр нь дээр нь нэмнэ.

Жижиг саванд гадилаа сэрээгээр нухна. Гадил дээрээ сүүгээ хийнэ. 

Өөр нэг саванд гурил, хөөлгөгч, сода, давсаа хийж холино. 

Масло, элсэн чихрийн холимог дээрээ гадилтай холимогоо хийгээд дээрээс нь гурилны холимогоо хийж, сайтар хутгана.

Хэвэндээ зуурмагаа хийгээд 1 цаг орчим, шүдний чигчлүүр хуурай, цэвэр гарч иртэл болгоно. 15 минут хөргөсний дараа зүснэ. 

 

Гадилтай талх болсон байдал. Дотор нь гадилны хэсгүүд харагдаж байна.

Жорыг эндээс авав: http://www.foodnetwork.com/recipes/banana-bread-recipe.html?oc=linkback

Улаан буудайн өвс ургуулж, шүүсийг нь шахаж уух

Улаан буудайн өвс нь нялх ногооны адил маш шим тэжээлтэй, өдөр тутмын мультивитамин болгож хэрэглэж болох өвс юм. Өвснөөс шүүсийг шахаж хэрэглэж болно, өвсийг холигчинд хийж холиод бүх төрлийн шейкэнд хийж болно. Энэ улаан буудайн өвсийг хатааж нунтагласан бэлдмэлийг хүнсний нэмэлт болгон хэрэглэхийг зөвлөдөг. Бүх насныханд зориулагдсан тэжээл гэсэн үг юм. 

Улаан буудайн ач тусаас дурьдвал:
 
-60мл улаан буудайн өвс нь 900г ногоон ургамал идсэнтэй тэнцэх хэмжээний шим тэжээлтэй.
-Биеийг цэвэрлэж, хоргүйжүүлж, хорт бодисуудыг зайлуулна.
-Даралт бууруулж, цус төлжүүлнэ.
-Биеийн хүчиллэг орчныг саармагжуулж, хэвийн хэмжээнд нь оруулна. Шүлтшүүлнэ.
-Жин хасахад тусална, бодисын солилцоог эрчимжүүлнэ.
-Биеийн эвгүй үнэрийг арилгана.
-Хөгшрөлтийг удаашруулна.

Та бүхэн гайхаж байж магад. Яагаад ийм олон үйлчилгээ үзүүлж байна вэ гэж. Яагаад гэвэл гаднаас тэжээлээр хангаад өгөхөд /жишээ нь улаан буудайн өвсний шүүс/ хүний бие өөрөө өөрийгөө эмчилж, эдгээдэг.

Та юу иднэ, тэр нь таны биеийн эд эсийг үүсэлтэнд оролцоно. Муу хоол, хүнс идээд байвал таны бие улам л муудна.

Хэрэглэгдэх материалууд

1. Биоялзмаг. Монгол улсын Органик тэмдэглэгээтэй бордоо.  
2. Улаан буудайн үр. Органик дэлгүүрээс АНУ-ын Органик тэмдэглэгээтэй буудайн үр.
3. Суурь. Соёолж төвд төрөл бүрээрээ байдаг.
Нийт 20,000 орчим төгрөг болсон. 
 

Биоялзмаг, Wheat berries буюу улаан буудай, суурь

Эхний өдөр

Улаан буудайн үрээ усанд шилэнд хийж тавина. Өсдөг учраас шилнийхээ талаар хийж тавина.

2 дах өдөр

Шилний талаар байсан үр хөөж томорсон байна. 

 

Усыг нь асгаад, нилээн хэдэн удаа зайлж, ташуулдуулж тавилаа. Зайлахад амар болгох гээд тагийг нь цоолон, марлиар бүрэв. Соёолжлуулах зориулалттай савууд дээрээ тортой тагтай байдаг. 

Өнөөдөртөө 3-4 удаа усаар зайлна. Сая нэг удаа зайлсан, өдөр, орой, унтахынхаа өмнө дахин цэвэр усаар зайлна.

Зайлсныхаа дараа ташуулдуулж тавина. 

Ташуулдуулж тависан байдал.

                                                                             3 дах өдөр

3 дах өдөр нь соёолсон улаан буудайн үрээ 1-1,5 см зузаантай, урьдчилан чийглэсэн хөрсөн дээр жигд, шигүү тараана.

Хөрсөн дээрээ тарааж тавьсан байдал

Дээр нь гал тогооны зузаан салфетка тавьж, усаар чийглэнэ. Салфеткийг байнга чийгтэй байлгана.

5 дах өдөр

4 дэх өдөр нь усалж чадаагүй. 

Ургуулж эхэлснээс хойш 5 дах өдрийн өглөө. 

 Оройны зураг. Их хурдан ургаж байна.

6 дах өдөр

 

Улаан буудайн өвс,

13 дах өдөр

Ургуулсан улаан буудайн өвснийхөө шүүсийг нь шахлаа. Их өндөр ургасан байгаа биз?

Өвсөө тайрч, угаагаад, шүүс шахагчинд хийж, шүүсийг нь гаргав. 1 тавиураас 300мл шүүс эхний удаад хангалттай гарах юм байна. Энэ удаа шүүс шахах явцдаа бага зэрэг асгасан тул 250мл шүүс гарав.

Улаан буудайн өвсний шүүсийг 30мл хэмжээгээр нэг удаад уулгадаг. Өдрийнхөө аминдэм, эрдэс, ногооны хэрэгцээг хангана гэсэн үг. Шахангуутаа 15 минутын дотор хоосон ходоодон дээрээ уух ёстой.

Нэгмөсөн бүх шүүсийг нь шахаад, өнөөдрийнхийгөө уугаад үлдсэнийгээ мөс хөлдөөх тавиурт хийж хөлдөөв. Энийгээ 1-2-оор өдөрт хүйтэн усанд хийгээд ууна. Хөлдөөх бол ямар нэгэн хүнсний бүтээгдэхүүний чанарыг алдагдуулахгүйгээр хадгалах хамгийн сайн арга юм.

Шинэ шахсан шүүсийг хөлдөөх гэж байгаа нь.

Гадны оронд 30мл шүүс нь 3-4$ буюу Монгол мөнгөөр 5000-7000 орчим төгрөг байна. Харин би 8 /30мл*8=240мл/ удаагийн уух өвсийг 10 орчим мянган төгрөгөөр /нэг тавиурын үнэ/ ургуулсан. Гэхдээ энэ үнэ бол Органик Америк үр, Органик Монгол биоялзмаг ашигласан үнэ. Энгийн хөрс, Монгол буудайн үрээр хийвэл өшөө хямдхан болох боломжтой. 

Шүүс шахсанаас хэд хоногийн дараа өвсөө үзтэл доод хэсгээрээ хөгзөрч, ялзарсан байсан тул хаясан. Үүнээс сэргийлэхийн тулд хүнсний содтой усаар өдөр бүр шүршиж байх ёстой юм байна. 

Нээрээ Агаруу дэлгүүрт улаан буудайн өвсний нунтаг 400мг*100капсултай 40 орчим мянган төгрөгөөр борлуулагддаг.

Улаан буудайн өвсний нунтгийн капсулд хийсэн бэлдмэл.

Гэртээ өөрийнхөө витаминыг тариад, ургуулаад, өөрийгөө болон гэрийнхнээ хямд, Органик, шинэ, бордоо, пестицид хийлгүйгээр ургуулсан суперхүнсээр хангаж байгаарай. Ялангуяа өвөл хаврын улиралд янз бүрийн аминдэм хэрэглэхийн оронд ингэж уувал эрүүл мэндэд их тустай. Яг үүнтэй адил арвайн өвсийг ургуулж, шүүсийг шахаж ууж болно. 

Зохистой хооллолтын тухай зөвлөмжүүд

Эрүүл, зөв зохистой хооллолт гэдэг нь таны биеийн үйл ажиллагаа хэвийн явагдахад шаардагдах тэжээлийн бодисуудаар бие махбодыг хангахыг хэлнэ. Доор дурьдсан зүйлс нь танд эрүүл хооллолтын талаар суралцах, тэжээллэг, амтлаг хоол хүнсийг бэлтгэж сурахад тань туслах болно. 

Та эрүүл, зохистой хооллосноор:

• Өдрийн турш эрч хүчтэй байна 

• Бие махбодийн хэрэгцээндээ тохирсон аминдэм, эрдэс бодисыг олж авна 

• Спорт болон бусад зүйлсээр хичээллэх эрч хүчтэй болно 

• Өсөлтийг хамгийн өндөр түвшин байлгана

• Биеийн жингээ эрүүл түвшинд хадгална 

• Эрүүл бус хооллолтын зуршлаас сэргийлнэ  

Зохистой хооллолт гэж юу вэ?

• Тогтмол цагт хооллох (өдөрт 3 удаа, өглөө, өдөр, орой) ба хооллолт хооронд эрүүл хөнгөн зууш сонгож байх (өлссөн болон илүү их энерги шаардсан үед)

• Шим тэжээлийн бодисынхоо хэрэгцээг хангахын тулд өдөр бүр аль болох олон төрлийн хүнсний зүйлсээс идэж байх (үр тариа, жимс, хүнсний ногоо, уураг, цагаан идээ)

• Амттан, нарийн боов, түргэн хоол зэрэг хүнснээс аль болох татгалзах

• Өлссөн үедээ хооллож, цадсан үедээ больж сурах

Эрүүл, зохистой хооллолтод туслах зөвлөмжүүд

Тогтмол хооллох цагуудаа алгасахгүй байх – хоол болон хөнгөн зуушны цагаа төлөвлөх

-Өдөрт 3 удаа хооллож хооллолт бүрийн дундуур хөнгөн зууш иддэг байх нь та өөрийн эрч хүч, эрүүл биеийн жингээ хадгалах хамгийн зөв зам юм. Учир нь та тогтмол хооллох цагаа алгассан болон хэт өлссөн үедээ эрүүл бус хүнсийг сонгох нь илүү байдаг. 

-Өглөөний цай тогтмол уух. Өсвөр насныхны 20% нь өглөөний цай уудаггүй, энэ байдал нь тэднийг үдээс хойш хэт их идэхэд хүргэдэг байна.

 Хүнсийг бэлтгэх энгийн, эрүүл арга замуудад суралцах 

-Хүнсийг боловсруулах эрүүл арга замуудыг сонгох. Жишээлбэл их хэмжээний тосонд гүн шарахын оронд грилдэж шарах, богино долгионы зууханд болгох, жигнэх, чанах арга замуудыг сонгох.

-Шинэ, хатаасан навч, ургамлууд (базилик, орегано, яншуй гэх мэт) болон нимбэгний зүсэм, нунтаг халуун чинжүү, цагаан гаа, сармис зэргийг сонгож хоолоо амтлах. 

Сахар – хэт их хэрэглэхээс зайлсхий 

-Чихэрлэг ундаанууд нь хэрэггүй, илүүдэл илчлэгийн томоохон эх үүсвэр юм. Энэ нь өөх болон таны биед хуримтлагдаж байдаг. Ердийн ундаа болон шүүсний оронд сахар агуулаагүй ундаа, ус, амт оруулсан ус зэргийг хэрэглэ. Тэр байтугай байгалийн гаралтай амт оруулаагүй шүүснүүд хүртэл таны бие ашиглагдахгүй их хэмжээний илчлэг агуулж байдаг. Хэрэв та хийжүүлсэн ундаа, шүүс уудаг бол үүнийг өдөрт 1 аягаас хэтрүүлэхгүй байхаар тооцож хязгаарла. 

-Бялуу, жигнэмэг, чихэр зэрэг хүнсэнд мөн их хэмжээний сахар агуулагдаж байдаг. Бүхэл үрийн болон улаан буудайн үрээр хийсэн амттанууд сахар бага агуулдаг. Дээрхи амттангуудыг хааяа нэг хэрэглэх нь зүгээр боловч урт хугацаанд эрүүл хүнсийг орлох хэмжээнд хүртэл хэрэглэж болохгүй. 

Хооллох үедээ тайван бай

 -Хооллож байх үедээ удаан, тайван бай. Тайван сууж, хооллохдоо дор хаяж 20 минут зарцуулж бай. Нэгэнт 20 минут өнгөрөхөд танд аль хэдийн цадсан мэдрэмж төрж дахиж идэх хүсэл төрөхгүй. 

-Өөрийн биеийг сонс. Өлссөн үедээ идэж, цадсан үедээ больдог байх нь таны бие энергийн хэрэгцээгээ тэнцвэржүүлж, ая тухтай байх нөхцөл болдог. Өөрөөсөө дараах асуултыг асуу. Би өлссөн учраас идэж байна уу? Эсвэл бухимдаж, стрессдсэн, уйтгарлаж, гунигласны улмаас идэж байна уу?

-Байгалийн гаралтай эслэгээр баялаг бүхэл үрийн бүтээгдэхүүн, хүнсний ногоо, жимс зэргийг хэрэглэ. Ингэснээр танд цадсан мэдрэмж бий болно.

Хоолны дэглэмийн талаар бодохоос зайлсхий

 -Дэлхий дээр сайн болон муу хүнс гэж байхгүй. Зохицуулж хэрэглэсэн үед бүх төрлийн хүнс эрүүл хооллолтын нэг хэсэг болдог. 

-Та нүүрс ус багатай, өөх тосгүй, дэглэм сахих хүнс худалдаж авах шаардлагагүй. Өөх тосгүй хүнсэнд амт үнэрийг хадгалахын тулд нэмэлт бодис нэмсэн байдаг. 

-Биеийн жин, хэмжээнээс илүү ТА өөрөө хамгийн чухал нь гэдгийг сана. Хатуу чанга турах төлөвлөгөөний улмаас таны эрүүл мэнд, аз жаргал хохирдог. Жин ихээр хасах нь таны биеийн өсөлтөд нөлөөлнө. Хэтэрхий чанга дэглэмийн оронд багахан хэмжээгээр амьдралын хэв маягаа өөрчлөх нь таны амьдралд илүү үлдэцтэй байдаг. Ингэснээр та илүү эрүүл, аз жаргалтай удаан амьдрах боломжтой.

 

Хэт идэхэд хүргэдэг 10 алдаа

Хэрэв танд хооллосныхоо дараа ходоод хэт дүүрсэн тааламжгүй мэдрэмж төрөх нь их байвал энэ нь хооллох зуршлаа өөрчлөх цаг болсныг анхааруулж байгаа юм. Өөрийн сайн сайхны төлөө иймэрхүү хэт идэх зуршлаа зогсоох хэрэгтэй. Та өөрөөсөө эдгээр дадал, зуршлууд таныг эрүүл хооллох, эрүүл хүнс хэрэглэхэд саад болж буй эсэхийг нэг асуугаад үзээрэй. Ингээд дараах 10 зуршил таныг хэт их идэхэд хүргэдэг ажээ. 

Өглөөний цайг алгасах

Өглөөний цайг алгасах нь магадгүй илүүдэл илчлэгээс зайлсхийх арга зам мэт санагдаж болох юм. Гэхдээ ингэснээр таны толгойд дараагийн хоолны талаар бодол орж ирэх бөгөөд үүний улмаас өдрийн хоолны үеэр хомхойрч их идэхэд хүргэдэг байна. 

Телевиз үзэж байхдаа идэх

Телевиз үзэж байхдаа юмуу компьютерийн урд сууж байхдаа байнга л ямар нэг юм идэж байдаг ихэнхи хүмүүс хэт их идэх зуршилтай болсон байдаг ажээ. Таны ухаан бодол телевизээр гарч буй зүйл, имэйл зэрэгт анхаарсан байх үедээ хооллолтын байдал, цадсан эсэх мэдрэмжид төвлөрч чаддаггүй байна. Үүнээс сэргийлэх арга зам нь тодорхой цагт хооллож хэвших юм. 

Хоолны орц хэмжээг хэрэгсэхгүй байх

Хэдийгээр бага хэмжээтэй хоол захиалсан байлаа ч гэсэн түүнийг идэж байхдаа тухайн хоолыг идэж байх үедээ сэтгэл хангалуун бай. Амттай пиццаны дараа дараагийн зүсмийг идэхгүй үлдээх, түүнээс зайлсхийхийн тулд өөрийгөө хянаж чадна гэдэгтээ итгэлтэй бай. 

Өлсөх болон цангах мэдрэмийг адилтгаж үзэх

Ихэнхи хүмүүс цангаж буй мэдрэмжийг өлсөж буй мэдрэмж хэмээн андуурдаг. Хэрэв та тун саяхан хооллосон байтал хангалтгүй мэт санагдаж байвал дараах зөвлөгөөг туршаад үзээрэй. Өлсөж буй болон цангаж буй мэдрэмжийг ялгаж салгахад бэрхшээлтэй байдаг тул энэ үед нэг стакан ус уугаад 20-30 минут хүлээсний дараа өлссөн мэдрэмж хэвээр байна уу гэдгээ бодоод үзээрэй. 

Хамтрагчийнхаа хэрэгцээнд тохируулж хооллох

Хэрэв таны хамт амьдардаг хүн хэт их идэхийг юман чинээ тоодоггүй бол түүнтэй цуг хоол хийж, хамт хооллохдоо хэт идэхээс зайлсхийнэ гэдэг бэрхшээлтэй байдаг. Тиймээс гэртээ хоол хийх үедээ ижилхэн орц бүтээгдэхүүнтэй байлаа ч гэсэн аль болох эрүүл хооллохыг хичээж бай. Жишээлбэл гахайн тагалцагаар хоол хийх үед таны нөхөр бүх зүйлийг хольж хийсэн том буррито идэхээр болбол та ч гэсэн үүнийг идэх ёстой гэсэн үг биш бөгөөд үүний оронд өөртөө бага хэмжээний гахайн тагалцаг болон авокадо жимстэй салад хийж идэж болно. 

Таны хэрэглэж буй аяга, таваг хэт том байх

Таны хооллож буй аяга, таваг таныг хэт идэхэд хүргэдэг гэдгийг мэдэх үү? Судлаачид том таваг бол хэт идэхэд хүргэдэг алдаа гэдгийг хэдийн тогтоожээ. Таны тавган дээр сул зай хэдий чинээ их байх нь таньд хоолны порц бодит хэмжээнээсээ төдий чинээ бага байгаа юм шиг мэдрэмж төрүүлдэг. Том тавгаа хоолоор дүүргэх гэхийн оронд аль болох жижиг таваг сонгох нь илүү дээр алхам болно. 

Буруу зуршилд хүлцэнгүй хандах

Судалгаагаар цагираг боов идсэнийхээ дараа буруу юм хийсэн мэт сэтгэгдэл төрдөг эмэгтэйчүүдийг ийм сэтгэгдэл төрдөггүй эмэгтэйчүүдтэй харьцуулж үзэхэд харьцангуй бага чихэрлэг зүйл иддэг байжээ. Өөрөөр хэлбэл буруу зуршлаа өөгшүүлэх биш харин ч буруу зуршилдаа санаа зовнидог, өөрчлөхийг хүсдэг байх нь хэт идэхээс сэргийлэхэд тусалдаг байна. 

Хэзээ ч амны зугаа (snack) хэрэглэдэггүй байх

Харамсалтай нь зарим хүмүүс бүх амны зугаа (snack)-ыг муу гэж боддог. Амны зугаа хэрэглэдэг байх нь таныг эрүүл хооллолтын зорилгод хөтөлдөг гэдгийг ойлгох нь чухал. Та эрүүл, зөв амны зугааг сонгон хэрэглэснээр энэ нь таныг ажлын ачааллын өмнө болон дараа тэжээлийн бодисоор хангаж өгдөг. Хооллолтын дундуур эрүүл, зөв амны зугааг сонгон хэрэглэснээр хэт идэхээс сэргийлэх боломжтой. 

Ажлынхаа дараа хэт их идэх

Та хэцүү ажлын ард гарсан бол өөрийгөө баярлуулж байна гэдэг нэрийдлээр хэт их идэхийг өөгшүүлж болохгүй. Хэрвээ хооллох цаг болоогүй л бол таны ажлын дараа идэх амны зугаа илчлэгийн хувьд 150калориас хэтрэхгүй байх нь зүйтэй. 

Сэтгэл хөдлөлдөө хөтлөгдөх

Хэрэв таны толгойд амттан идэх тухай хүсэл төрвөл өөрөөсөө “Би өлсөж байна уу” гэдэг энгийн асуултыг асуугаад үзээрэй. Энэ гурван үг энгийн боловч таны хэт их идэх зуршлыг өөрчлөхөд томоохон хувь нэмэр болно.